العودة   منتدى رياض الجنة - Riad Al-Ganah > الرياض العامة > روضة الحوار العام

روضة الحوار العام يدرج بها المواضيع العامة الهادفة التي لا تندرج تحت اي روضة من الرياض المدرجة

إضافة رد

  #1  
قديم 09-18-2011, 07:11 AM
الصورة الرمزية khaledbelal
khaledbelal khaledbelal غير متواجد حالياً
مبرمج المنتدى
الادارة تكليف لا تشريف
 
تاريخ التسجيل: Oct 2009
العمر: 34
المشاركات: 3,606
افتراضي خطوات عمل الcv بشكل بروفيشينال (بالتفصيل الممل)

خطوات عمل الcv بشكل بروفيشينال (بالتفصيل الممل)


مقدمة:
نبدأ الأول بتعريف الCV عشان تعريفه هو اللى هيخلينا نكتبه صح إن شاء الله
الCV ما هو إلا بطاقة تعارف بين الشخص اللى بيبحث عن وظيفة و بين المكان اللى بيقدم فيه ما يختلفش كتير عن الكارت الشخصى Business Card نفس الفكرة تماما من هنالازم نعرف المعلومة اللى المفروض تبقى مكتوبة فى الكارت ده إيه عشان تجذب العميل إنه يقابلك و أحب أوضح نقطة مهمة جدا صحيح إن الكارت اللى مليان ألوان و صور و طباعة فاخرة بيبقى ملفت بس بيبقى ملفت للفرجة مش للاهتمام بالشخص و الناس شايفة الصنايعية مثلا واصحاب الحرف اليدوية بيعملوا كروتهم ازاى مع كامل احترامى طبعا لأصحاب الحرف دى.
الCVلازم يكون بسيط ما فيهوش شغل كتير و صور ألوان مالتى كلرز للفونت بتاعه و ما يبقاش الفونت كبير برده يعنى من مقاس 11 ل 13 على الأكثر. الCV's اللى بالمنظر ده صحيح بتتلاحظ بسهولة و بتكون ملفتة بس فى الغالب الأعم ما بتتاخدش بجدية و فى شركات كمان مجرد إنها تلاقى CV بالشكل ده ما بتبصش فيه أصلا عكس ما الناس معتقدة و تلاقى التعب اللى تعبته فيه يبقى هو السبب اللى خلى الCV يترفض.
ده عن شكل الCV و أحب أوضح كمان حاجة مهمة هنا الCV مش مفروض أبدا إنه يتعمل بإطار خارجى للورقة (Frame) مهما كان بسيط ما بالكم بقى بالناس الى بتحط ألوان و ورود و نجوم والحاجات دى.
= = = = = = = = = = = = = = = = = = = = = = = = = =
= = = = = = = = = = = = = = = = = = = = = = = = = =
مكونات الCV كبيانات:
الداتا أو المعلومات اللى بتتكتب فى الCV لها أهمية كبيرة فى ترتيبها بشكل إحترافى يبرز مؤهلات و مواهب الشخص و إمكانياته و للتسهيل على الفرد اللى بيفرز الCV's (Screening) إنه يطلع الشخص المناسب للوظيفة بسهولة ويسر و ما يبقاش تايه فى الCV مش عارف يطلع معلومة و احدة و أحب أضيف إن الترتيب ده بيختلف حسب طبيعة الشخص صاحب الCV مقارنة بخبرته فى الأساس والوظيفة اللى بيقدم فيها من ناحية تانية
إذا كانت وظيفة عملية (مهندس مثلا) أو وظيفة مكتبية (إدارى / سكرتيرة.......) + إن فى مكونات بتيقى مهمة جدا فى مرحلة من حياتك أول ما تتخرج أو تبتدى شغل و بتعملك وزن جامد جدا و بعدين تبتدى تقل أهميتها بالتدريج مع تدرجك الوظيفى لحد ما توصل بمعنى الكلمة إنها ما يبقاش لها أى فائدة تماما و ممكن كمان تكون بتقلل من الCV بتاع الشخص عكس أهميتها فى المرحلة الوظيفية السابقة زى التدريب الصيفى مثلا.
التدريب الصيفى من الحاجات المهمة جدا اللى بيتحكم بيها على حديثى التخرج على الرغم من إن الكل عارف إنه باستثناء المهن العملية زى هندسة أو بعض أقسام علوم مثلا بيبقى التدريب ده فى الغالب شكل بس و ما بيشتغلش المتدرب لاكتساب خبرة فى مجال معين و لكن على الرغم من كده له أهميته و تقييمه و كفاية بإنه بيدل على الاعتمادية العالية على الشخص اللى ضحى بالإجازة بمزاجه عشان يشتغل و فى نفس الوقت احتك بسوق العمل بدرى و على الأقل راحت منه رهبة الشغل. طبعا التدريب الصيفى مهم و أنت خريج جديد أو Junior يعنى اشتغلت مرة أو مرتين قريبين فى الوقت بس بعد كده لما يبقى ليك ثقل وظيفى و خبرة فى مجال معين بيبقى ما لهوش أى لازمة إنه يفضل فى الCV بالعكس و عمرنا طبعا ما شفنا مدير أى حاجة فى الدنيا كاتب فى الCV بتاعه إنه اتدرب أثناء الكلية على المحاسبة فى بنك مثلا.
كمان موضوع الترتيب اللى بدأت بيه النقطة دى مهم جدا يعنى مثلا:
حديثى التخرج أو (Fresh Grad.) + Juniors ترتيب مكونات أو الItems فى الCV بتختلف عن المديرين و الSeniors. فى النموذج الأول هتلاقى التعليم أو Education فى الأول و بعدين الخبرات الوظيفية أما فى النموذج التانى هتلاقى الخبرات الوظيفية الأول طبعا و يمكن فى الآخر يحط التعليم عشان بس يعرفك خلفيته التعليمية إيه على أساس إن فى البداية التعليم هو كل ما تملك عشان تبدأ وظيفة فى الغالب طبعا مش بشكل عام لكن مع مرور الوقت ممكن ما تشتغلش بكليتك تماما و تشتغل بعيد عن دراستك و تبقى حابب المجال ده و عايز تكمل فيه هنا بقى بيبقى المهم فالأهم خبرتك و المجال اللى انت عايزه قبل الدراسة.

آسف للمقدمة الطويلة بس عشان الأساس فى أى حاجة مهم ولازم الناس لما تشوف CV فى آخر الموضوع تعرف كل حاجة مكتوبة ليه و إذا كان وضعها فى المكان ده صح ولا غلط.


نبتدى بقى الشغل المهم شكل الCV طبعا مش هعيد كلامى مرة تانية بس بناءا على اللى كتبته أى CV ينطبق عليه الللى أنا قلته فوق يبقى تمام و برده اللى يتجنب العيوب المشار إليها مش شرط شكل معين المهم إنه يكون بسيط و مترتب و بفونت مناسب زى ما قلت مش كبير شكله يضحك و مش صغير ما يتقريش يعنى من من11 بس لحد 13زى ما قلت. و بلاش خالص كتابة Bold أو Underline أو Italicإلا فى حالات معين زى الهايلايت highlighting لمعلومات معينة عايزين نبرزها لكن بلاش فونتات عناوين مجلات أندلسى و رموز و الكلام ده و الفنكشنز اللى أنا ذكرتها دلوقتى تستعمل بحساب و فى موضعها و مش شياكة أبدا إنك تكتب الموضوع كله بيها.

و طبعا برده تسهيلا للناس اللى مش هتقدر تعمل ديزاين من أوله لCV فى على برنامج الوورد MS Word ويزارد لعمل CV ستاندارد ممكن نستغله و نغير فيه بس البيانات.

= = = = = = = = = = = = = = = = = = = = = = = = = =
= = = = = = = = = = = = = = = = = = = = = = = = = =
طريقة إنشاء CV من MS Word بداية:
1- حول الستارت منيو لكلاسيك (يمكن يكون فى حد أفضل منى فى الكمبيوتر يقدر يفيد الأعضاء بطريقة أسهل فى النقطة دى بس ده اللى أنا أعرفه) افتح المنيو- رايت كليك- properties- click start menu- check classic start menu)
2- لما تفتح ال classic Start Menu هتلاقى فوق Programs هتلاقى New office ........ كليك عليها
3- هتفتح ويزارد فيها أوبشنز كتيرة كليك على Other ........s
4- هتلاقى آخر 3 فايلات مكتوب عليهم Resume و الرابع Resume Wizard
5- التلاتة اللى فى الأول عبارة عن CV's استاندارد ببيانات وهمية ما عليك غير إنك تغيرها.
6- الأخيرة الويزارد بتعمل تصميم الCV من البداية. (و الاختيار ليكم طبعا)
وبكده أكون مبدئيا وفرتلكم نموذج تقدروا تبنوا عليه.
نيجى بقى للجزأ الأهم فنيات كتابة الCV نفسه:

أولا اسم الشخص زى البيزنيس كارد اسمك لازم يكون الأكبر كفونت و أعلى الصفحة و مايزيدش عن سطر بكل حال من الأحوال و حاول ما يكونش رباعى و خماسى ياريت يكون آخره ثلاثى (اسمك + اسم والدك + اسم العائلة) بلاش يا جماعة كلمة CV اللى بتتحط فى الأول و الله باين لوحده مش محتاج إنك تعرفه تانى و افتكروا إنك ما بتكتبش على الكارت إنه كارت. مثالMohamed Adel Khairy

ثانيا:بيانات الاتصال Contact Details فى أغلب الCV's الاستاندارد بتكون فوق الاسم مباشرة (فى سقف الصفحة بفونت صغير جدا مش بس أصغر من فونت الاسم أصغر كمان من فونت كتابة الCV نفسه
طبعا فى النماذج بتاعة الوورد مكانها هيبقى واضح و أنا إن شاء الله هحطلكم نموذج كامل فى آخر الموضوع
مثال

Address: 16 Kambeez St., Nadi El Said St., El Mohandseen, Gizah, Egypt
Home No.: (+2) 02xxxxxxxx – Mobile No.: (+2) 010xxxxxxxxx
Email: mohamed.adel@yahoo.com


الملاحظات المهمة فى الداتا السابقة (طبعا الاسم و الايميل افتراضى بس عشان ماحدش يفتكر إن أنا محمد عادل ده)
1- العنوان الأول و بنفس التفصيل ده توقع إنه بيبقى فى وقت من الأوقات الكونتاكت الوحيد اللى ممكن يوصلولك بيه و لازم تكتبه لحد الدولة باعتبار إنك مش شرط تكون مقدم فى مصر و مش هتعمل CV لكل دولة هتشتغل فيها. و نفس القصة تنطبق على +2 اللى هى = 002 كود الدولة
2- طبعا فى ناس كتيرة و خصوصا البنات مش بتحب تحط نمرة البيت و دى مهمة جدا لازم يكون فى خط أرضى بديل يقدر يوصلك عليه افرض موبيلك اتغير رقمه مثلا. و حتى الناس اللى بتحط خطين موبيل يا ريت ما تستغناش عن الخط الأرضى لأن أحيانا اللى هيتصل بيك من شركة يكون مستعجل مثلا و خطوط الموبيل فى الشركة مشغولة أو انت خارج نطاق الخدمة أو موبايلك فاصل شحن إلى آخره من الأمثلة اللى بتوضح أهمية وجود خط أرضى.
3- الإيميل لازم يا جماعة يكون فورمال ميل بلاش فى الإيميل اللى بتحطه فى الCV يكون Nick Name أو اسم دلع توتو لولو و ديدى و الكلام ده. كتير شركات بتشوف إن ده Disrespect أو قلة احترام ليها.

ثالثا:الأوبجيكتيف Objectiveالغرض من تقديم الCV ناس كتير جدا ما بتكتبوش و ناس تانية بتعمله كوبى وبيست من أى حتة من غير ما تعرف هى كاتباه ليه مجرد شكل تكميلى بس الحقيقة يا جماعة و عن تجربة شخصية الObjective ده مهم جدا لأنه بيشرح فعلا الغرض من التقديم أنا مقدم ليه و عشان أشتغل إيه قبل الكلام الاستاندارد بقى اللى بييجى بعد كده تفخيم فى نفسى و فى الشركة اللى أنا مقدم فيها. بمعنى لازم تحدد الأأول النقط اللى فاتت و بعدين كمل فيه براحتك. مثال:
Seeking a challenging position in HR in a multinational organization where I can make good use of my experience background to help achieve the growth of this organization as well as developing my knowledge, enhancing my skills through my new tasks.
طبعا مش عايز حد يعمل المجال بولد أو أندرلاين بس دى مجرد هايلايتنج ليكم عشان دى أهم حاجة فى الأوبجيكتيف المجال اللى انت مقدم عشان تشتغل فيه و على فكرة بدايتى فى HR جات من النقطة دى بعت الCV بتاعتى بالميل لشركة و كنت وقتها شغال Administration و كتبت إنى عايز أشتغل فى الHR حسوا إن دى رغبة عندى عشان التحديد و أول ما فضيت وظيفة عندهم فى الHR و على الرغم من إنها كانت أعلى من خبرتى إلا إنها كانت أول وظيفى ليا فى المجال ده و السبب الهايف اللى ماحدش بياخد باله منه الObjective.

رابعا:التعليم Education طبعا هعيد تانى ممكن تبقى الخبرات الأول حسب خبرة الشخص بس هنا هحط التعليم الأول على أساس إن أغلب اللى هيستفيدوا من الموضوع لسه فريش أو جونيورز.
مثال بقى مباشرة:
2001 – 2004 Sadat Academy for Management Science (SAMS)

B.A., Management Sciences/specialized in “Petroleum & Energy Installation”
§ Grade: Very Good.
§ Graduation Project: A research in “Alternative energies and their effects on petroleum prices in future”.
§ Project Grade: Excellent (Rank 1st).
نفس الترتيب من سنة كام لسنة كام لأن دى بتوضح لو انت عدت السنة فى النص عشان فيه ناس بتكتب سنة التخرج بس يا ريت بلاش عشان بيشكوا إنك سقطت و دى مهمة جدا فى تقييمك و انت لسه خريج جديد حتى لو كنت سقطت بجد برده سنة أحسن من سنتين أحسن من تلاتة فخليك صريح لأنهم هيشكوا فى جميع الأحوال.
اسم الكلية – الجامعة و بعدين اسم الشهادة يا ريت من غير تأليف أو ترجمة حرفية - التخصص
التقدير حتى لو كانت مقبول. مشروع التخرج لو كان فيه و تقدير المشروع.
لو انت كنت مدرسة لغات دى بتفرق جدا بتدى ثقة فى لغتك أكتر فلازم تحط المدرسة بس طبعا بعد الكلية (قاعدة الأهم فالمهم) و بنفس الطريقة.
إيه اللى ممكن يتحط فى التعليم قبل الكلية الدراسات العليا Post Graduate Studiesدبلومة متخصصة زى HR Diploma مثلا أو ماجيستير أو دكتوراه و هكذا.
بس إوعى حد يغلط و يحط كورس كمبيوتر مثلا أو كورس لغات ده طبعا مش تعليم بالمعنى و مش أكبرمن تعليمك الجامعى عشان يتحط هنا.

خامسا:الخبرات الوظيفية Experience بداية لازم تبدأ الترتيب الزمنى من آخر وظيفة مش بالترتيب الطبيعى يعنى من الوظيفة الحالية و انت نازل برده (قاعدة الأهم فالمهم) و الأهم دلوقتى طبعا شغلك الحالى و ركز أوى فى شغلك الحالى بكل تفاصيله. مثال:

El Rashidi El Mizan Confectionary 6 October, Egypt.
Compensation & Benefits Specialist (January 2006 – October 2006)



Responsible for monthly payroll administration, incentives administration and some personnel related tasks.




§ Preparing and ensuring accurate monthly closing transactions e.g. overtime. Leaves etc.
§ Taking over all monthly payroll procedures.
§ Tracked time attendance for employees and record absence and lateness cases.
§ Assured the required records and reports are maintained and issued.

لاحظوا الهايلايتنج Highlighting فى المثال اسم الشركة Boldالوظيفة Italicو هكذا فقط الحاجات اللى محتاجة تظهر أو تبان أكتر و بعدين سطرين صغيرين عن مجمل طبيعة شغلك باختصار و بعد كده الوصف الوظيفى أو Job De......ion
ممكن حد يستغرب ليه الاتنين و احنا ممكن نكتفى بواحد المشكلة افرض الCV ده امتحان هل انت عارف اللى بيصحح بيصحح إزاى فى مدرسين بيبقى نفسهم الورقة تبقى مليانة بصرف النظر عن المضمون و فى مدرسين بيحبوا يشوفوا نقط محددة 1. 2. 3. و ما بيحبوش الرغى الكتير و احنا لازم نعمل حساب الكل.
فلازم تعرف إن فيه حد هيكتفى بقراية السطرين دول و فى ناس هتفصص النقط و المهام اللى بتقوم بيها فى وظيفتك عشان هى محتاجة نقطة معينة مثلا و طبعا اسم الوظيفة لوحده بيبقى كارثة من غير المهام و الوصف لأننا فى مصر المسميات الوظيفية بتتوزع زى الدعاية بتاعة المحلات ما عندناش مسمى وظيفى واحد تعرف مباشرة منه الشخص ده بيعمل إيه و بتختلف طبعا من شركة لشركة حسب حجم الشركة و حجم العمالة بها و مجال العمل و طبيعة الهيراركى أو المستوى الهرمى و الإدارى للشركة عشان كده الجزء ده مهم جدا جدا جدا
و مهما كانت هيافة اللى انت بتعمله من وجهة نظرك ما دام فى مجال شغلك لازم تذكره (يعنى لو سكرتيرة مثلا بتستقبل عملاء و بترد على تليفونات و إيميلات و بتكتب فاكسات و .......) كل اللى فات ده على حده يعتبر جزء أو نقطة من الوصف الوظيفى و ممكن كمان الناس تخش على النت تجيب بالبحث الوصف الوظيفى للمسمى بتاعها و تنقى منه هى بتعمل إيه عشان الصياغة.

سادسا: التدريب الصيفى Summer Training المفروض المقصود بيه التدريب بتاع الشركات مش كورسات تدريبية و ممكن كمان يتقال عليه Summer Jobs بس ما يتحطش فى الجزأ بتاع الخبرات الوظيفية لأن فى الغالب انت مش بتطلع منه بخبرة تغير مجالك مثلا أو تفيد أكتر من التعليم و ده برده الغالب الأعم مش الكل. مثال:
July-2001 Saaid El Sarrag Company Cairo, Egpyt.

Training in Finance Dept. (1 Month)
وقت التدريب – الشركة و ياريت مكانها و بعديها التدريب تم فى إدارة XXXX لمدة XX و برده الترتيب لازم يكون من الآخر للأول.

ثامنا اللغات Languagesمثال علطول عشان مش محتاجة شرح:

Languages:
§ Arabic: Mother Tongue.
§ English: Excellent (TOFEL Certified from Amideast)

لاحظوا حاجتين لازم تكتبوا العربى لأنه حتى لو ماكانش مطلوب فى مصر فممكن يكون مطلوب بره شركة بتتعامل مع عرب مثلا و بعدين لازم تكتبوا إنه اللغة الأم كدليل على التمكن من اللغة
و الإنجلش مستواكم بصراحة Fair, Good, VGood, Excellent و لو فى أى كورسات ليها علاقة باللغات تتكتب معاها مش فى سكشن لوحدها لأنه مش هيدور غير على اللى شايفه قدامه. يعنى هيقيم لغتك بس من المكان ده مش من مكان الكورسات.

تاسعا الكومبيوتر Computerمثال مباشرة برده:

Computer:
§ Excellent in Ms Office applications (Office Automation Course).
§ Good User of Internet.
§ Very good in using GP (ERP System) in HR and Payroll Module.

أول غلطة جامدة بس مش موجودة فى المثال ده اللى بيكتب ويندوز 98 و 2000 و XB طبعا ده من غير ما أجرح حد بيضحك اللى بيقرا عشان الويندوز ده نظام تشغيل فمادام كتبت إنك تعرف تستعمل الكومبيوتر طبيعى إنك تعرف تشغل ويندوز و إيه الفرق من وجهة نظرك ما بين الإصدارات التلاتة اليوزر العادى مش هيشوف الفرق غير فى الانترفيس الشكل الخارجى اللى بتتعامل منه. فيا ريت بلاش نظم التشغيل إلا لو كنت تعرف حاجة تانية زى اللينوكس مثلا لأنه نادرا أما يكون حد اشتغل عليه و ساعتها حط الويندرز عشان الناس ما تفتكرش إنك بتشتغل لينوكس بس.
الحاجة التانية افصل بين كل مجموعة متجانسة زى تطبيقات الأوفيس مثلا مش لازم تقعد تقول وورد إكسيل باور بوينت أكسيس إلا لو كنت ما تعرفش تشتغلهم كلهم لكن لو كنت تعرف تشتغل الأربعة اللى فاتوا دول على الأقل مش لازم تفنطهم حطهم رزمة واحدة. و برده زى اللغات لو أخدت كورس اكتبه فى نفس المكان.
و النت لوحده عشان مهارات البحث عن طريق الانترنت و استعمال الإيميل و الآوت لوك.
و أخيرا لو اشتغلت على أى نظام أوراكل أو ERP System أو أى تطبيق كمبيوتر خاص محاسبى مثلا مكانه هنا فى الكمبيوتر مش فى الوصف الوظيفى زى ما ناس كتير يتغلط.

عاشرا: البيانات الشخصية Personal Dataمثال:

Personal Info
Marital status: Single.

Military Services: Exempted.

Nationality: Egyptian.

Date of Birth: June 8, 1982.
النقط اللى مكتوبة هنا دول أهم حاجة فى البينات الشخصية و اللى المفروض يتكتب مافيش حاجة اسمها Gender إلا لو اسمك مضلل وسام ولاء كده على الرغم من إن الخدمة العسكرية كفاية بس المشكلة إن فى بنات بتكتب الخدمة العسكرية و قدامها Not Applicable (لا تنطبق) طب بتكتبيها ليه مالهاش أى فايدة و المفروض برده ما تكتبش الديانة لأنه مش مفترض إنها مجال تقييم رغم اعترافى الشخصى بإنه ساعات بيحصل ولا أرقام الأيديز زى البطاقة و البسبور و رخصة القيادة و الرقم التأمينى ماحدش هيروح يسأل عليك فى المرور على فكرة. طبعا دى كلها داتا مالهاش أى لازمة و غير مفيدة بالمرة. ملاحظة إذا اتولدتم فى دولة تانية غير بتاعة الجنسية لازم تكتبوها مكان الميلاد XXXXX

الحادى عشر: المهارات الشخصية Personal Skills و دى عبارة عن مهاراتك و طبيعة شخصيتك اللى تخليك أجدر بالوظيفة باختصار Soft Skills زى الCommunication Skills و ال Time Management Skills و ال Leadership Skills و طبعا الهدوء والشغل تحت ضغط و سرعة التعلم و الطموح و غيره من الصفات الشخصية العظيمة. المهم السكشن ده بالذات ما تطولش فيه لأن ماحدش بيخده بجدية أوى و فى نفس الوقت اللى هيخده بجدية هيفصصك فى الإنترفيو لحد ما يتأكد من كلامك و غير كده المفروض ما ترغيش فيه كتير لأنه جزء مكمل. نقطتين أو تلاتة على الأكتر. مثال:
Personal Skills

● Hard worker and appreciate team work spirit.
● Ability to work under pressure.

الثانى عشر: الهوايات Hobbies من غير ما حد يضحك طبعا هى الأقل أهمية فى كل الحاجات اللى فاتت بس ساعات من فقر الCV بتاعة الفريش بيتبص فيها باهتمام أوى فلازم نتوخى الدقة فى اللى بنكتبه هنا مش الصراحة و إلا ما نكتبهاش أصلا يعنى مثلا شفت CV لحد كاتب إنه بيحب الكوتشينة جدا و الفرجة على التليفزيون تقييمى إيه لصاحب الCV إنه حد فاضى و متدلع و ممكن موضوع الكوتشينة ده يحسسنى إنه بتاع قمار مثلا. فخلينا دايما نكتب حاجة ممكن تفيد فى التعرف على شخصيتنا زى المثال الجاى:
Hobbies

● Reading.
● Gym Exercises.

القراءة تدل على الشغف بالمعرفة و كثرة الإطلاع
و تمرينات الجيم تدل على إن الإنسان ده نشيط Active و رياضى.

الثالث عشر: مثال علطول:
اختموا الCV بالكلمة دى

References available upon request

و معناها الشهادات و المراجع متاحة حسب الطلب طبعا دى بالترجمة الحرفية للجملة و المقصود بيها إنك لما تقدم الCV ما تحتاجش تقدم معاه أى أوراق تانية لا شهادة الكلية و لا شهادات التدريب أو الخبرة أو الكورسات أو أى حاجة ذكرتها فى اcv

= = = = = = = = = = = = = = = = = = = = = = = = = =
= = = = = = = = = = = = = = = = = = = = = = = = = =

و فى الختام أحب أنهى بحاجة برده مهمة جدا بلاش تحطوا أبدا صور إلا لما يكون مطلوب منكم كده عشان انتوا كده بتدوا فرصة للشخص اللى هيعملكم الانترفيو إنه يكون حاطط فكرة مسبقة فى دماغه عنكم يعنى مثلا هنفترض واحد ملتحى (مربى دقنه) أول ما الInterviewer هيشوف صورته على الCV هيعتقد إنه حد معقد و متزمت و مش ممكن يتعامل مع جمهور بسلاسة و ممكن يرفض الCV من الأساس من غير ما يختبر الشخص أصلا.
و إذا حصل و اتطلب منك تحط صورة (Sending photo is a must) يبقى لازم تكون لابس فى الصورة زى ما هتلبس فى الإنترفيو بدلة كاملة و تكون ألوانها متناسقة مع القميص و الكرافت و تكون صورة شخصية 4*6
بلاش خالص الصور العادية و اللى بالحجم الطبيعى عشان أنا شفت ده قبل كده، و بالنسبة للبنات تحاول برده تكون الصورة بلبس فورمال على قد ما تقدر و بلاش الجينز خالص و بلاش تبقى ((Over Makeup لأن كل اللى أنا قلته ده بيتقيم من خلال الصورة و بتقيم هل الشخص Presentable أو لأ و البنت جد و لا دلوعة مش بتاعة شغل و ما تستهتروش بالحاجات دى أنا كنت شغال فى شركة توظيف لمدة سنة و كسر و كل اللى أنا قلته ده عدى عليا.
وبمناسبة شركات التوظيف بلاش تعملوا الCV's بفورمات PDF يا ريت Word و بس عشان بتبقى مشكلة بالنسبة لهم لما بيمسحوا الكونتاكت ديتيلز بتاعة حضرتك عشان يبعتوا الCV لشركات تانية و التعامل بالهارد كوبى و الفاكسات بيبقى متعب و ممل فممكن يستسهلوا و يبعتوا CV تانية بيبقى عندهم داتا جامدة مش مستنيين على ال CV بتاعتك

المصدر منتدى ملتقى الدارين


توقيع : khaledbelal



(أَفَأَمِنَ أَهْلُ الْقُرَى أَن يَأْتِيَهُمْ بَأْسُنَا بَيَاتاً وَهُمْ نَآئِمُونَ {97} أَوَ أَمِنَ أَهْلُ الْقُرَى أَن يَأْتِيَهُمْ بَأْسُنَا ضُحًى وَهُمْ يَلْعَبُونَ {98}
أَفَأَمِنُواْ مَكْرَ اللّهِ فَلاَ يَأْمَنُ مَكْرَ اللّهِ إِلاَّ الْقَوْمُ الْخَاسِرُونَ {99}).
سورة الأعراف.

رد مع اقتباس
  #2  
قديم 09-18-2011, 04:21 PM
الصورة الرمزية المشتاقة للجنة
المشتاقة للجنة المشتاقة للجنة غير متواجد حالياً

مراقبة عامة

 
تاريخ التسجيل: Nov 2009
المشاركات: 4,422
افتراضي

و عليكم السلام رحمة الله وبركاته

جزاكم الرحمن خيرا ونفع بكم


توقيع : المشتاقة للجنة


اللهم اغفر لي ولوالدي وللمؤمنين والمؤمنات والمسلمين والمسلمات الاحياء منهم والاموات

اللهم صل وسلم وبارك على حبيبنا محمد وعلى آله وصحبه اجمعين

رد مع اقتباس
إضافة رد


« الموضوع السابق | الموضوع التالي »
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
سلفي | #Israel #SALAFY #JORDNأردنـ | عاجـل | أعداد المتظاهرين تزداد بشكل طردي ف... S.N.N اخبار شبكة سلفي الاخبارية | S.N.N 0 09-15-2011 08:01 PM
سلفي | انواع خطيرة من السل تنتشر بشكل ينذر بالخطر في أوروبا. #salafy ===========... S.N.N اخبار شبكة سلفي الاخبارية | S.N.N 0 09-14-2011 10:08 AM
طرق طبخ الطعام في المايكروييف بشكل صحيح امل محمد مرسي روضة المطبخ 1 01-20-2011 09:42 PM
google dns | تقنية جوجل الجديدة عيش النت بشكل تاني efham computer روضة الشروحات وتبادل الخبرات 1 10-31-2010 03:52 PM
أختاه أيتها الأمل المشتاقة للجنة روضة الاخت المسلمة 2 07-05-2010 06:20 PM

استضافة الحياة

الساعة الآن 03:54 PM.


Powered by vBulletin® v3.8.4, Copyright ©2000 - 2024, Jelsoft Enterprises Ltd. , TranZ By Almuhajir
النسخة الفضية
Ads Management Version 3.0.1 by Saeed Al-Atwi

SlamDesignzslamDesignzEdited by Riad Al-Ganah Team - جميع الحقوق محفوظة لشبكة رياض الجنة

Privacy Policy Valid XHTML 1.0 Transitional By SlamDesignz Valid CSS Transitional By SlamDesignz